Выкладчыка Ваеннай акадэміі з каранавірусам выратавалі пасля 66 дзён на ШВЛ
22.07.2020 / 18:28
Хворы на каранавірус выкладчык Ваеннай акадэміі 64-гадовы Уладзімір Бутэнка больш за два месяцы правёў на апараце штучнай вентыляцыі лёгкіх. Яго выратавалі спецыялісты Галоўнага ваеннага клінічнага медыцынскага цэнтра, паведамляе міністэрства абароны.
Уладзімір Бутэнка трапіў у аддзяленне інтэнсіўнай тэрапіі і рэанімацыі Галоўнага ваеннага клінічнага медыцынскага цэнтра 10 мая. У яго быў дыягнаставаны COVID-19 і аднабаковая пнеўманія. Адразу ж мужчыну перавялі на ШВЛ.
14 ліпеня Уладзіміра Бутэнку нарэшце знялі з апарата ШВЛ. Ён яшчэ працягвае заставацца кіслародазалежным, але ўжо гаворыць, можа самастойна есці, у яго былі родныя.
Цяпер мужчына адчувае сябе добра, дзякуе дактарам за дапамогу.