Hałoŭny sanitarny doktar Minska: Pakul što nie rekamiendujecca pić vadu ŭ Maskoŭskim i Frunzienskim rajonach

26.06.2020 / 22:06

Zychodziačy z vynikaŭ łabaratornych daśledavańniaŭ, nasielnictvu Maskoŭskaha i Frunzienskaha rajonaŭ stalicy pakul što nie rekamiendujecca vykarystoŭvać vadu z-pad krana dla pićcia. Pra heta hałoŭny dziaržaŭny sanitarny doktar stalicy Neli Hindziuk raspaviała žurnalistam.

Pa słovach Hindziuk, jość asobnyja abjekty, žyłyja damy, arhanizacyi, pa jakich jašče majucca niestandartnyja vyniki pa takim pakazčyku, jak pach. U asobnych probach vyjaŭlena pieravyšeńnie pa pakazčyku «chłaraform» i piermanhanatnaj akiślalnaści. Manitorynh praciahvajecca: u rabocie znachodziacca bolš za 100 probaŭ, pa jakich vyniki buduć viadomyja da ranicy.