«Školnyja ekzamieny ciapier — heta prafanacyja, i ŭsie heta viedajuć»
Niadaŭna Alaksandr Łukašenka znoŭ aburyŭsia na sistemu adukacyi. Niezadavolenaść vyklikała CT. Kiraŭnik krainy anansavaŭ vialikuju naradu naprykancy hoda, dzie budzie abmiarkoŭvacca, ci nie varta zamianić testy na kłasičnyja vusnyja ekzamieny tvar u tvar i abjadnać vypusknyja i ŭstupnyja ekzamieny.
28.08.2019 / 16:34
Dyrektar adukacyjnaha centra «Fabryka viedaŭ» Alaksandr Łucevič tłumačyć, čamu admova ad centralizavanaha teściravańnia była b krokam nazad u adbory talentaŭ.
Dyrektar adukacyjnaha centra «Fabryka viedaŭ» Alaksandr Łucevič.
«CT vyklučaje faktar asabistych intaresaŭ — karupcyju, kumaŭstvo. CT robić usich pa-dobramu roŭnymi: adkul ty, ci jość u ciabie suviazi — niavažna. Teściravańnie pakazvała realny stan školnaj adukacyi. Ale što ŭ hetym kiepskaha?
Pa fizicy siarednija bały byli maleńkija — 27, 30. Što zrabili ŭ apošni hod? Pravodzić reformu adukacyi vielmi ciažka i doraha. Ale možna ŭziać i źmianić sistemu padliku, kab maleńkija bały pavialičyć, a vialikija krychu apuścić. I atrymajecca, što ŭ škole ŭ vučnia siamiorka, na CT jon nabraŭ 55 bałaŭ, i heta narmalna. Takoje šulerstva.
Toje, što možna było natykać adkazy i nabrać narmalnyja bały, — heta prablema novaj sistemy padliku. Ja spadziajusia, što sistemu padkarektujuć. Zrešty, na vynikach pastupleńnia va ŭniviersitet jana nie krytyčna adbiłasia. Kali pahladzieć na prachadnyja bały, to jany padnialisia tam, dzie byli maleńkimi (na ahranoma ŭmoŭna było 130, a stała 170), a na takich fakultetach, jak Fakultet mižnarodnych adnosin, jurydyčny jak byli vysokija, tak i zastalisia.
Ale navat z hetymi chibami CT — adekvatnaja i spraviadlivaja sistema. A vusny ekzamien nas adkinie ŭ ciemru karupcyi i viernie tyja prablemy, jakija ŭdałosia vykaranić.
Ab’iadnać vypusknyja i ŭstupnyja ekzamieny było b łahična, ale tolki kali ich buduć zdavać pa sistemie CT. Bo zaraz atrymlivajecca, što škoła nie rychtuje da pastupleńnia va ŭniviersitet — jana rychtuje da svaich vynikovych ekzamienaŭ.
Školnyja ekzamieny ciapier — heta čaściej za ŭsio prafanacyja, i ŭsie heta viedajuć.
Tam maksimum možna padniać ci apuścić adznaku na adzin-dva bały, bolej nielha, bo buduć prablemy. Łahična prybrać hetuju prafanacyju, ale kali rabić adzin ahulny ekzamien, to kab jaho prymali pa sistemie CT, u vypadkova abranaj škole i z nieznajomymi kantralorami, kab acenka viedaŭ była sapraŭdy niezaležnaja.
Treba nie bajacca napisać u spravazdačach nižejšyja bały za ekzamien, čym za hod.
Ale naša sistema nie praduhledžvaje takoj sumlennaści. Čamu CT i mulaje voka šmat kamu? Bo jano spraviadlivaje i pry im ciažka zmuchlavać».