У Расіі патлумачылі скачок радыяцыі ў Северадзвінску праходжаннем воблака
16.08.2019 / 19:58
У дзень выбуху на ваенным палігоне пад Северадзвінскам у горадзе зафіксавалі павышэнне радыяцыйнага фону. Паводле Расгідрамета, прычынай стала воблака радыеактыўных інертных газаў, піша РБК.
«Мяркуецца, што павышэнне магутнасці амбівалентнага эквіваленту дозы гама-выпраменьвання на пастах 8 жніўня 2019 года звязанае з праходжаннем воблака радыеактыўных інертных газаў», — гаворыцца ў паведамленні.
Кароткачасовае павышэнне радыяцыйнага фону зафіксавалі на шасці пунктах у Архангельскай вобласці каля 12:00, тады як у 14:30 сітуацыя нармалізавалася. Як растлумачылі ў Расгідрамеце, метэаралагічная сітуацыя ў Архангельскай вобласці 8 жніўня спрыяла хуткаму рассейванню воблака.