Пракуратура канфіскавала прададзеную школу ў Баранавіцкім раёне і аштрафавала пакупніка на 840 тысяч рублёў
19.07.2019 / 22:11
Дагавор куплі-продажу скасавалі, таму што новы ўладальнік не выканаў галоўнай умовы: вядзенне прадпрымальніцкай дзейнасці з залучэннем гэтай маёмасці не пазней за тры гады з моманту перадачы.
Баранавіцкая міжраённая пракуратура. Фота: Intex-press.
Будынак сярэдняй школы ў вёсцы Савічы прыватнае прадпрыемства купіла ў 2015 годзе. За тры гады выкарыстоўвалася толькі прылеглая да школы тэрыторыя, і то не па прызначэнні. У выніку гэтага будынак часткова разбурыўся, тэрыторыя стала закінутай. Акрамя гэтага, любы мог зайсці на небяспечны аб'ект.
Пракуратура ў інтарэсах аддзела адукацыі райвыканкама звярнулася ў эканамічны суд Брэсцкай вобласці з пазовам аб скасаванні дагавора куплі-продажу нерухомай маёмасці і спагнанні з прадпрыемства штрафных санкцый у памеры больш за 840 тысяч рублёў.
Школу вярнулі аддзелу адукацыі. Баранавіцкая міжраённая пракуратура працягне праверку таго, як мясцовыя ўлады кантралююць выкананне ўмоў гаспадарчых дагавораў.