Pasoł Jeŭrasajuza adkazała na inicyjatyvu Makieja pa spraščeńni pierachodu miažy
04.06.2019 / 17:31
Paskareńnie pracesu pierachodu biełaruska-jeŭrapiejskaj miažy — pytańnie infrastruktury, i JeS układvaje ŭ jaje hrošy. A pahadnieńnie ab spraščeńni vizavaha režymu Minsk i Brusiel padpišuć paśla zaviaršeńnia ŭnutrydziaržaŭnych pracedur, jakija mohuć zaniać dva-try miesiacy. Pra heta ŭ kamientary Tut.by zajaviła kiraŭnica pradstaŭnictva JeS u Biełarusi Andrea Viktaryn, kamientujučy ŭ kułuarach sieminara da 10-hoddzia «Uschodniaha partniorstva» «pamiežnyja» inicyjatyvy biełaruskaha MZS.
Fota: Darja Burakina, Tut.by.
Čytajcie taksama: Makiej: Heta nie narmalna, kali ludzi čakajuć pa 10-15 hadzin na miažy, a to i sutki
Nahadajem, Uładzimir Makiej, a taksama jaho namieśnik Aleh Kraŭčanka, na roznych placoŭkach prapanavali Brusielu damahčysia taho, kab pierachodzić miažu Biełarusi ź Jeŭrasajuzam možna było nie daŭžej čym za hadzinu.
Viktaryn nahadała, što JeS užo ŭkładvaje hrošy ŭ pamiežnuju infrastrukturu na miažy z Biełarussiu i na biełaruska-ŭkrainskaj miažy. Dypłamat pryznaje, što jość mahčymaść rabić bolš.
— Heta pytańnie i techničnaje — patrebna infrastruktura. Punktam pamiežnaha pierachodu, napeŭna, treba bolš miesca. Patrebnyja dvuchbakovyja damovy pamiž dźviuma krainami-susiedkami.
Viktaryn adznačyła, što Jeŭrapiejski inviestycyjny bank budzie realizoŭvać prajekt pa madernizacyi infrastruktury na adnym pahranpierachodzie na miažy Biełarusi i Litvy.
Pieramovy ž pa spraščeńni vizavaha režymu pamiž Biełarussiu i JeS užo zavieršany, supiarečnaściaŭ niama, tekst uzhodnieny, kaža surazmoŭca.
Zaraz Minsk i Brusiel pavinny pravieści dakumient praz usie ŭnutrydziaržaŭnyja pracedury, adznačaje Viktaryn. Pavodle słoŭ dypłamata, hety praces moža zaniać 2-3 miesiacy, a zatym baki vychodziać na padpisańnie dakumientaŭ. Čakajecca, što dla hetaj cyrymonii praviaduć sustreču na vysokim uzroŭni.