Biełarusy chočuć źniać kamiedyjny sieryjał pra viosku i źbirajuć na jaho hrošy
Supołka entuzijastaŭ vyrašyła źniać biełaruski sieryjał. Pa słovach aŭtaraŭ, kamiedyja «Svaje» zaklikana ŭznavić uspaminy pra svaje karani, rodnyja viosački i pasiełiščy, lubimych babul i dziadul.
21.05.2019 / 16:07
Pradziusier prajekta Alaksiej Malcaŭ raskazvaje, što ideja ŭźnikła ŭ minułym listapadzie. U lutym praviali kastynhi akcioraŭ — zaprasili zvyčajnych ludziej z narodu. Ź miedyjnych asob u kino zdymiecca viadučy i śpiavak Ivan Vabiščevič, viadomy jak Dziadzia Vania.
Siužet taki. Chłopiec źbirajecca ažanicca, ale ŭźnikła prablema: niaviesta choča šykoŭnaje viasielle, a hrošaj niama. Adčajnaje stanovišča! Chłopiec vyrašaje pradać dom, jakija zastaŭsia ŭ spadčynu ad dziaduli. Ale chto ž pradaje dom, u jakim prajšło tvajo soniečnaje dziacinstva? Aŭtary kino anansujuć kamiedyjna-detektyŭny siužet, luboŭny trochkutnik i chepi-end.
Sieryjał budzie składacca z šaści sieryj, praciahłaść kožnaj — da 45 chvilin.
Kino raskaža pra žyćcio haradžanina na vioscy. Pakažuć taksama elemienty tradycyjnych abradaŭ i śviataŭ. Naprykład, u druhoj sieryi budzie svatańnie i Maślenica (abo Kupalle — zdymačnaja hrupa jašče vyrašaje).
Čamu sieryjał? Aŭtary tłumačać: taki farmat dazvalaje pakazać žyćcio niaśpiešna. A hladač, nazirajučy za hierojami, pryvykaje da ich i čakaje praciahu.
Zdymki buduć prachodzić za 75 km ad Minska. Usia kamanda i akciory pracujuć zadarma. Aparatura i pamiaškańni dla zdymak jość. Ale patrebny hrošy na charčavańnie i transpart. Kab sabrać ich, kamanda zapuściła kraŭdfandynhavuju kampaniju na placoŭcy «Vulej». Pakul ź nieabchodnych 3000 rubloŭ (stolki pa padlikach aŭtaraŭ patrebna na pieršuju sieryju) jość tolki 134.
Ale pradziusier zapeŭnivaje: kino buduć zdymać u lubym vypadku, navat kali kali kraŭdfandynh pravalicca.
— Pakul sieryjał raźličany na internet, ale kali hatovy pradukt budzie hodnym, budziem staracca prasunuć jaho na tb i ŭ kinateatry, — dzielicca jon płanami.
Premjera čakajecca ŭ śniežni 2020 hoda.