Paśla kastryčnickaha apdejta Windows 10 u karystalnikaŭ pavydalalisia fajły z tečki «Maje dakumienty»

06.10.2018 / 14:08

Apieracyjnaja sistema Windows vydalaje fajły z kampjutaraŭ padčas ustanoŭki kastryčnickaha apdejta. Pra heta piša lenta.ru sa spasyłkaj na partał MSPoweruser.

Adznačajecca, što fajły źnikajuć z papki «Maje dakumienty» ŭ pracesie abnaŭleńnia da Windows 10 (1809). Karystalniki śćviardžajuć, što nie zmahli viarnuć fajły z dapamohaj adkatu da papiaredniaj viersii.

«Boža! Tečka «Dakumienty» była całkam vydalena, u vyniku čaho ŭsie danyja (fajły Word, tablicy i inšyja) źniščany. Usio stračana, a apošniaja reziervavanaja kopija była zroblenaja vielmi daŭno», — piša adzin z karystalnikaŭ.

Inšy juzier na forumie Microsoft raspavioŭ, što sistema vydaliła 220 hihabajt danych, jakija jon źbiraŭ na praciahu 23 hadoŭ. Jamu tolki paraili rehularna rabić reziervavanuju kopiju biez tłumačeńnia.

Akramia hetaha, u novaj viersii sistemy nazirajucca prablemy sumiaščalnaści z pracesarami Intel pakaleńnia Skylake i naviejšymi. Heta pryvodzić da rostu nahruzki na čyp, a ŭ vypadku z noŭtbukami značna pamianšaje čas aŭtanomnaj pracy.

U kampanii adreahavali na prablemy i pierad pačatkam abnaŭleńnia pačali vyvodzić papiaredžańnie, paśla jakoha možna adkacić da papiaredniaj viersii sistemy.