U Lidzie invalid stamiŭsia prasić u MTBanka pandus i ŭziaŭ kredyt, kab kupić jaho samastojna. Dalejšyja pavodziny banka ŭražvajuć
29.08.2018 / 14:45
Alaksandr Aŭdzievič — chłopiec ź Lidy, jaki straciŭ mahčymaść chadzić u vyniku avaryi.
Ale jon nie spyniŭ kamunikacyi sa śvietam, žyvie aktyŭnym žyćciom.
U pryvatnaści — maje patrebu časta naviedvacca ŭ MTBank. U Lidzie jaho addzialeńnie tolki adno, i, sa słovaŭ Alaksandra, u jaho byli viečnyja prablemy z dostupam unutr, bo zajezd nie byŭ abstalavany pandusam.
Aŭdzievič nieadnarazova źviartaŭsia da addzialeńnia z prośbaj ustalavać pandus.
«Ja tryvaŭ, ja čakaŭ, ja prapanoŭvaŭ, ja pierapisvaŭsia ceły hod. Ale voś tak, akazvajecca, usich zadavalniaje. Zdajecca, vysakosny hod, a moža, tak i treba», — tak chłopiec padsumavaŭ vyniki sprobaŭ damovicca z bankam u svaim fejsbuku.
I što jon zrabiŭ dalej?
Aformiŭ u hetym samym MTBanku jašče adnu kartku «Chałva», jakaja dazvalaje rasterminoŭvać płaciož, sam kupiŭ pandus i padaryŭ jaho banku.
Momant pryjezdu i dareńnia Alaksandr zafiksavaŭ na videa.
Sa słovaŭ Alaksandra, jamu jašče daviałosia napisać papieru ab zhodzie pieradać pandus banku ŭ dar.
Jak hetuju situacyju kamientujuć u samim banku?
Kiraŭnik lidskaha addzialeńnia skazała «Našaj Nivie», što havaryć nie budzie i kinuła trubku.
Skrynšot ź videa, dzie supracoŭnica banka raźbirajecca, jak karystacca nabytym pandusam.
Ale vykazaŭsia centralny ofis.
U svaim kamientary jany adznačyli, što «supracoŭniki banka vyrašali ceły šerah arhanizacyjnych i techničnych pytańniaŭ dla praviadzieńnia rabot pa ŭstanoŭcy stacyjanarnaha pandusa».
Maŭlaŭ, inicyjatyva Alaksandra nabyć mabilny pandus «paskoryła hety praces».
Taksama ŭ svaim kamientary bank paabiacaŭ kampiensavać Aŭdzieviču hrošy.