П'яная гарадзенка выкінула разбітую шклянку праз акно. І займела крымінальную справу
Пачалося ўсё з таго, што 31-гадовая гарадзенка, знаходзячыся ў сябе дома, разбіла шклянку. Да сметніцы аскепкі вырашыла не несці, а проста выкінуць іх у акно.
25.07.2018 / 17:50
Але трэба ж было такому здарыцца, што разбітая шклянка трапіла ў аўтамабіль «Рэно Сандэра» і пашкодзіла яго пакрыццё, паведамляе УУС Гродзенскага аблвыканкама.
На раніцу гаспадар машыны пабачыў пашкоджанні і звярнуўся ў міліцыю. Асобу падазраванай міліцыянеры вызначылі і завялі крымінальную справу па артыкуле «Хуліганства».
Жанчыне можа пагражаць пакаранне ад грамадскіх прац да пазбаўлення волі на тры гады.