Здаць і зняць жыллё на кароткі тэрмін цяпер можна без пісьмовага дагавора і рэгістрацыі

05.03.2018 / 20:26

У Беларусі спрошчаныя патрабаванні да здачы ў арэнду жылых памяшканняў фізічнымі асобамі. Гэта прадугледжана ўказам №103, які Аляксандр Лукашэнка падпісаў 5 сакавіка, паведамляе БелТА.

У прыватнасці, дакументам спрашчаюцца патрабаванні, устаноўленыя жыллёвым заканадаўствам, да формы дагавораў аб прадастаўленні жылых памяшканняў, садовых домікаў і дач, якія належаць фізічным асобам, для кароткатэрміновага пражывання іншым фізічным асобам. Цяпер яны могуць заключацца як у пісьмовай, так і ў вуснай форме.

Адначасова выключаны абавязак рэгістраваць такія здзелкі ў мясцовых выканаўчых і распарадчых органах.