Створаны акумулятар, які цалкам зараджаецца за 20 секунд і працуе даўжэй за звычайныя
Спецыялісты з Вышэйшай школы энергетыкі KAIST, што ў Карэі, распрацавалі крыніцу сілкавання, здольную цалкам зараджацца ўсяго за 20—30 секунд, паведамляецца на сайце навукова-тэхнічных навін Phys.org.
05.03.2018 / 11:14
Ілюстрацыйнае фота
Каб стварыць такую прыладу, даследчыкі злучылі валаконна-падобныя палімерныя ланцугі з металааксіднымі нанакатодамі на паверхні графена. Дзякуючы ўнікальнай структуры плошча назапашвальніка энергіі значна павялічылася.
Анод і катод: ілюстрацыя з даследавання.
Адзначаецца, што зарадка любога гаджэта з дапамогай такой батарэі дазваляе захоўваць зарад значна даўжэй, чым звычайна.
«Сам акумулятар можа зараджацца за 20—30 секунд пры выкарыстанні маламагутнай зараднай прылады, напрыклад, USB-перахадніка. Прычым ён можа зараджацца нават пры велізарнай сіле току, у сто разоў вышэйшай за тую, што мы зараз выкарыстоўваем. Больш за тое, распрацоўка паказала высокую стабільнасць: акумулятар не толькі вытрымлівае высокае напружанне, але і мае больш доўгі жыццёвы цыкл», — распавядаюць навукоўцы.
Разам з тым даследчыкі падкрэсліваюць, што прылада не ўяўляе пагрозы для бяспекі чалавека і экалогіі ў цэлым.