Na Čarnobylskaj AES pabudavali soniečnuju elektrastancyju, naŭprost la sarkafaha čacviortaha enierhabłoka
10 studzienia 2018 hoda hienieralny dyrektar Rodina Energy Group raspavioŭ ab zaviaršeńni budaŭnictva pieršaj nievialikaj soniečnaj elektrastancyi mahutnaściu 1 miehavat, jakaja składajecca z 3800 fotaelektryčnych panelaŭ, ustalavanych na płoščy 1,6 ha usiaho ŭ sotni mietraŭ ad čacviortaha reaktara Čarnobylskaj AES, nakrytaha dvuma sarkafahami, raspaviadaje Seeker.
15.01.2018 / 16:27
Na zadnim płanie za soniečnymi panelami bačny sarkafah čacviortaha enierhabłoka ČAES. Fota: Genya Savilov/AFP/Getty Images.
Stancyja zmoža zabiaśpiečvać elektraenierhijaj nievialiki pasiołak, albo dźvie tysiačy haradskich kvater.
U dalejšych płanach kiraŭnictva Solar Chernobyl, jakaja zajmajecca prajektam, — ustanoŭka novych soniečnych panelaŭ. Sonca nad Ukrainaj bolš, čym, naprykład, nad Niamieččynaj, i vykarystoŭvać ziamlu ŭ zonie adčužeńnia inakš praktyčna niemahčyma, tamu adnaŭlalnaja enierhietyka zdajecca łahičnym rašeńniem i ŭkrainskim čynoŭnikam, i inviestaram: prajektam užo zacikavilisia francuzskaja kampanija Engie SA i kitajskija System Integration Technology Co. Ltd. dy China National Complete Engineering Corp.
U 2016 hodzie kampanija Solar Chernobyl, sumiesny prajekt ukrainskaje Rodina Energy Group i niamieckaha kancerna Enerpark AG, pačała šukać inviestaraŭ dla budaŭnictva soniečnaj elektrastancyi ŭ zonie adčužeńnia. U kancy listapada minułaha hoda ab tym, što budaŭnictva pieršaj soniečnaj elektrastancyi ŭ Čarnobyli nabližajecca da zaviaršeńnia, paviedamlała ahienctva Bloomberg. Udakładniałasia taksama, što abjom inviestycyj u budaŭnictva skłaŭ 1 miljon jeŭra.