Da pałovy sakavika ŭ Žytkavickim rajonie majuć pabudavać časovy most zamiest prasiełaha
14.01.2018 / 14:16
Časovy abjazny most praz Prypiać u Žytkavickim rajonie budzie ŭźviedzieny da siaredziny sakavika, paviedamlaje BiełTA sa spasyłkaj na hienieralnaha dyrektara RUP «Homielaŭtadar» Ihara Matviecova. U ciapierašni čas na dvuch bierahach raki darožnymi słužbami viadziecca abstalavańnie padychodaŭ da budučaha masta — nasypajecca ziemlanoje pałatno.
«Paśla hetaha śpiecyjalisty piarojduć da ŭźviadzieńnia masta. Jon budzie ŭjaŭlać saboj mietaličnuju zborna-razbornuju kanstrukcyju. Ruch pa im budzie adkryty dla transpartu i dla ludziej», — rastłumačyŭ Ihar Matviecov.
Fota — BiełTA
Budaŭnictva časovaha mosta razam z uźviedzienym pantonnym — adna ź mier, jakaja zamianiaje stacyjanarny aŭtamabilny most praz Prypiać, u kanstrukcyi jakoha 7 śniežnia minułaha hoda była vyjaŭlenaja raskolina.
Nieabchodnaść budaŭnictva časovaha mosta tłumačycca tym, što pantonnaja pieraprava nie vytrymlivaje kryhachodu. Jak paviedamlałasia, u noč na 14 studzienia z-za rezkaha źmianieńnia ŭmoŭ nadvorja — pajšoŭ lod — sarvała pantonny most. U ciapierašni čas prymajucca miery pa jaho adnaŭleńni.
Pavodle infarmacyi, raźmieščanaj na aficyjnym sajcie MNS, da vyrašeńnia situacyi ratavalnikami na katerach ažyćciaŭlajecca pieravozka ludziej z adnaho bieraha na inšy. Pa stanie na 10.00 niadzieli, pieravieziena 39 čałaviek (36 darosłych, 3 dziaciej).