Hihancki ajśbierh ciaham piaci hadoŭ zahubiŭ kala 150 tysiač pinhvinaŭ VIDEA
14.02.2016 / 14:09
U Antarktydzie kala 150 tysiač pinhvinaŭ zahinuli ad hoładu z-za hihanckaha ajsberha, jaki pryšvartavaŭsia da ich kalonii. Ledzianaja hłyba zablakavała ptuškam dostup da vady i iežy.
Jak paviedamlaje The Guardian, hłyba lodu, płoščaj 2,9 tysiačy kvadratnych kilametraŭ ŭkliniłasia va ŭźbiarežža antarktyčnaj zatoki Sadružnaści i pazbaviła kaloniju pinhvinaŭ dostupu da vady i iežy.
Miescam masavaha pražyvańnia pinhvinaŭ navukoŭcy nazyvajuć mys Denisan, jaki ŭrazaŭsia ŭ zatoku, bahatuju rybaj. Ciapier ža kalasalny ajsberh pazbaviŭ pinhvinaŭ mahčymaści dabracca da iežy, a adlehłaść da bližejšaha ŭźbiarežža składaje 60 km.
Sam ajsberh pierakryŭ dostup da vady jašče ŭ 2011 hodzie, i z taho času papulacyja pinhvinaŭ, jakaja apynułasia ŭ hałodnaj pastcy, rezka skaraciłasia.
Pavodle acenak navukoŭcaŭ aŭstralijskaha universiteta ŭ Novym Paŭdniovym Uelsie, za piać hadoŭ ad 160 tysiač pinhvinaŭ zastałosia nia bolš za 10 tysiač. Pieršyja kalonii pinhvinaŭ tut byli vyjaŭleny bolš za 100 hadoŭ tamu.
Daśledčyki prahnazujuć, što kalonija pinhvinaŭ na mysie Denisan źniknie całkam, kali tolki ajsberh nie razburycca ci ž nie pačnie drejf da susiednich bierahoŭ.