Padatkovyja orhany Minska pačali realizacyju mier u miežach dekreta ab «darmajedstvie»
14.05.2015 / 19:09
Padatkovyja orhany Minska pačali realizacyju mier, praduhledžanych dekretam № 3 «Ab papiaredžańni sacyjalnaha darmajedstva». Pra heta paviedamiŭ 14 maja na pres-kanfierencyi načalnik inśpiekcyi Ministerstva pa padatkach i zborach Uładzimir Łajkoŭ.
Pavodle jaho słoŭ, takaja praca raspačata i aktyŭna pravodzicca pierš za ŭsio praz rastłumačeńnie, u tym liku z dapamohaj srodkaŭ masavaj infarmacyi.
«Analizujecca finansavy stan hramadzian, patrabujucca va ŭstanoŭlenym paradku dekłaracyi ab dachodach i majomaści. Hramadzianie, jakija nie biaruć udzieł u finansavańni dziaržaŭnych raschodaŭ u 2015 hodzie, buduć abaviazanyja da 15 listapada 2016 hoda ŭnieści ŭ dachod biudžetu 3 młn 600 tys. rubloŭ», — zaznačyŭ Łajkoŭ.
Namieśnik načalnika inśpiekcyi MPZ pa Minsku Halina Hurynovič paviedamiła, što zaraz vyznačajecca paradak uzajemadziejańnia dziaržaŭnych orhanaŭ, jakija niepasredna buduć brać udzieł u składańni śpisaŭ hetak zvanych sacyjalnych utrymancaŭ. Hetyja śpisy buduć pradastaŭleny ŭ padatkovyja inśpiekcyi da 1 lipienia 2016 hoda.
Pavodle słoŭ Hurynovič, padatkovyja orhany sa svajho boku vykarystoŭvajuć śpiecyjalnuju aŭtamatyzavanuju sistemu, pa jakoj možna atrymać infarmacyju ab dachodach ci raschodach luboha hramadzianina. «I na padstavie hetaha budzie bačna, pracuje jon ci nie pracuje, i jakija darahija nabytki ŭ jaho jość. Viadoma, u takich hramadzian my, pierš za ŭsio, zapatrabujem dekłaracyi», — rastłumačyła namieśnik načalnika inśpiekcyi MPZ pa Minsku.
Nahadajem, dekret byŭ padpisany 2 krasavika «ŭ metach stymulavańnia pracazdolnych hramadzian da pracoŭnaj dziejnaści i zabieśpiačeńnia vykanańnia imi kanstytucyjnaha abaviazku pa ŭdziele ŭ finansavańni dziaržaŭnych raschodaŭ».
Zhodna z dekretam hramadzianie Biełarusi, a taksama zamiežnyja hramadzianie i hramadzianie biez hramadzianstva, jakija žyvuć u respublicy i nie biaruć udzieł u finansavańni dziaržraschodaŭ ci biaruć udzieł u takim finansavańni mienš za 183 kalandarnyja dni ŭ hod, pavinny vypłačvać zbor u 20 bazavych vieličyniaŭ (siońnia heta 3 młn 600 tys. rubloŭ).
Alaksandr Łukašenka 18 krasavika paabiacaŭ pry nieabchodnaści vypravić da kanca hoda situacyju z dekretam ab papiaredžańni sacyjalnaha ŭtrymanstva, jaki vyklikaŭ šyroki hramadski rezanans. «Da kanca hoda my budziem manitoryć situacyju, kab nichto niezasłužana nie paciarpieŭ. Pamylilisia — papravim, ale treba, kab jon papracavaŭ», — skazaŭ jon.
Pavodle słoŭ kiraŭnika dziaržavy, zaraz staranna adsočvajecca ŭsia infarmacyja, u tym liku ŭ ŚMI, dzie «vykazvajecca niekatoraja zaniepakojenaść» nakont dekreta № 3. «Da kanca hoda my budziem manitoryć situacyju, kab, sapraŭdy, nie daj boh, nichto niezasłužana nie paciarpieŭ ad hetych nahruzak, hetak zvanaha darmajedstva», — skazaŭ jon. «Tamu nie treba pieražyvać i napružvacca. Usio budzie narmalna. Kali ja padpisaŭ dakumient, heta nie aznačaje što ja padpisaŭ jaho napiaredadni prezidenckich vybaraŭ, kab ukałoć nasielnictva. Ni ŭ jakim vypadku. Ja prosta chaču pastupić jak dziaržaŭny čałaviek, a nie jak palityk. Tamu što abo mnie, abo kamu-niebudź paśla prezidenckich vybaraŭ treba ž pracavać. I papulizm tut ni pry čym. I ŭmovy pavinny być roŭnyja i narmalnyja», — zaznačyŭ Łukašenka.
Pavodle acenak ekśpiertaŭ, siońnia naličvajecca kala 400 tysiač čałaviek, jakich ułady mohuć adnieści da «sacyjalnych utrymancaŭ».