U Kramli nazvali «łuchtoj» paviedamleńni ab psichičnym zachvorvańni Pucina
06.02.2015 / 12:50
Reuters.com
Pres-sakratar prezidenta Uładzimira Pucina Dźmitryj Piaskoŭ nazvaŭ «hłupstvam, jakoje nie zasłuhoŭvaje kamientara», paviedamleńni amierykanskich ŚMI ab tym, što śpiecyjalisty Pientahona zapadozryli ŭ Pucina psichičnaje zachvorvańnie — sindrom Aśpierhiera..
Ab padazreńni na zachvorvańnie raskazała napiaredadni vydańnie USA Today. U 2008 h. adnym z analityčnych centraŭ Pientahona było padrychtavana daśledavańnie, u jakim vykazvałasia teoryja ab najaŭnaści ŭ prezidenta Rasii Uładzimira Pucina sindromu Aśpierhiera, pra heta zajaviŭ karespandent Rej Łokier, što atrymaŭ dostup da spravazdačy.
Pry hetym śpiecyjalisty ŭkazvajuć, što ŭ roznych ludziej sindrom vyjaŭlajecca pa-roznamu, i vyklučna pa źniešnich prykmietach, biez tamahrafii mozhu, dyjahnaz stavić nielha.
USA Today taksama zaznačaje, što prafiesar psichijatryi Univiersiteta Paŭnočnaj Karaliny Styvien Pordžes, jaki ŭ 2008 hodzie schilaŭsia da mierkavańnia ab najaŭnaści ŭ Pucina niejkaj formy aŭtyzmu, ciapier na pytańni žurnalistaŭ adkazvaje, što nikoli nie bačyŭ kančatkovaha tekstu daśledavańnia i chacieŭ by ŭstrymacca ad śćviardžeńniaŭ ab najaŭnaści ŭ Pucina sindromu Aśpierhiera.
U čacvier hetaja tema stała adnoj z hałoŭnych na amierykanskim telebačańni i spravakavała aktyŭnaje abmierkavańnie ŭ sacyjalnych sietkach i błohach.
Ludzi ź sindromam Aśpierhiera mohuć mieć ciažkaści z sacyjalnaj kamunikacyjaj, sacyjalnym uzajemadziejańniem i sacyjalnym ujaŭleńniem.
Heta aznačaje, što im moža być ciažka interpretavać žesty i vyraz tvaru, razumieć mietafary i sarkazm, prytrymlivacca niapisanych «sacyjalnych normaŭ», a taksama pradstaŭlać alternatyŭnyja scenary padziejaŭ, razumieć punkt hledžańnia inšych ludziej i interpretavać pačućci i dziejańni navakolnych.