Novym redaktaram haziety «Biełorusy i rynok» stała Valancina Vieštart
Źmiena składu akcyjaneraŭ i kiraŭnictva redakcyi adbyłasia ŭ aŭtarytetnym dziełavym vydańni «Biełorusy i rynok».
06.02.2015 / 10:13
Zasnavalnik, raspracoŭnik kancepcyi i hałoŭny redaktar Viačasłaŭ Chadasoŭski, jaki kiravaŭ hazetaj na praciahu apošnich 25 hadoŭ, pierajšoŭ na pasadu šef-redaktara. Na miesca hałoŭnaha redaktara zastupiła kolišniaja žurnalistka «Ekanamičnaj hazety», byłaja redaktarka časopisa «Biełaruskaja sielskaja haspadarka» Valancina Vieštart.
Viačasłaŭ Chadasoŭski pradaŭ častku svaich akcyjaŭ niekalkim pryvatnym asobam, u liku jakich — hieneralny dyrektar «Eŭraradyjo» Źmicier Novikaŭ.
Mienavita jon na pačatku tydnia i pradstaviŭ kalektyvu tydniovika novuju redaktarku Valancinu Vieštart.
Zasnavalnik hazety Viačasłaŭ Chadasoŭski zaklikaje nijakich padvodnych kamianioŭ u novych akcyjanerach i redaktary nie šukać:
«Heta nie zamiena, jak niekatoryja sprabujuć padać. Ja zastajusia ŭ hazecie šef-redaktaram, pracuju. Prosta planavaja ratacyja. Valancina Vieštart pakul uvachodzić u kurs spravy. My pra heta havaryli ŭžo dosyć daŭno: usio ž treba brać pad uvahu ŭzrost, zdaroŭje, treba pacichu pačynać i pra heta dumać. Ale na hety momant ja pracuju ŭ zvyčajnym režymie, zajmajusia kantentam, usim astatnim i pastupova pieradaju patrebnyja dla spravy viedy».
Karespandent: «Jak staviciesia da dumak, što takim čynam raspačaŭsia praces kardynalnych źmienaŭ na rynku biełaruskich medyjaŭ?»
«Dy što za hłupstva? Viečna treba niešta prydumać. Nijakaha padziełu, usio pracuje, jak i pracavała. Prosta jość peŭnyja prablemy sa zdaroŭjem, treba padstrachavacca, voś i ŭsio. Toje, što atrymajecca — pahladzim dalej. Ale ja akcyjaner, trymalnik akcyjaŭ. U mianie ŭsio narmalna, nie chvalujciesia».
Na «ŭvachod u kurs spravy» Valancinie Vieštart adviedzieny miesiac, paśla čaho jana pačnie vykonvać abaviazki hałoŭnaha redaktara — najpierš u sfery prasoŭvańnia internet-versii hazety i markietynhavaj palityki.
Pra padrabiaznaści ździełki my paprasili raskazać i zasnavalnika prajektu «Eŭraradyjo», novaha akcyjanera hazety «Biełorusy i rynok» Źmitra Novikava:
«Najpierš, padavałasia niapravilnaja infarmacyja, tamu što «Eŭraradyjo» nie nabyvała nijakich akcyjaŭ.
Tam pryvatnyja zasnavalniki, novyja, u tym liku jość tam i ja — jak pryvatnaja asoba, voś heta praŭda. Druhi momant — što tyčycca kancepcyi. Ja kazaŭ padčas sustrečy i sa spadarom Viačasłavam, i ź inšymi žurnalistami, što razmova idzie pra nastupnaje. Było vydańnie, jakoje, ja asabista dla siabie liču,było niezaležnym ekanamičnym vydańniem, jakoje było lideram u Biełarusi. Na siońniašni dzień z roznych pryčynaŭ tak nia jość, ale chaciełasia b, kab heta viarnułasia. Što za saboj ciahnie taksama inšy momant — vydańnie ŭ perspektyvie pavinna pačać zarablać. Voś, u pryncypie, asnoŭnyja momanty».
Fihura Valanciny Vieštart nia vielmi «raskručanaja» ŭ žurnalisckim asiarodździ. Nakolki apraŭdanaja staŭka na novaje imia? Źmicier Novikaŭ kaža, što ŭ składanaj ekanamičnaj sytuacyi nia tak prosta znajści čałavieka, jaki ŭvohule advažyŭsia b uskłaści na siabie takuju adkaznaść:
«Heta my ŭžo pabačym pa fakcie, što atrymajecca. Čałaviek pahadziŭsia ŭziać na siabie adkaznaść za hetuju spravu, a heta sprava nadzvyčaj składanaja, asabliva ŭ siońniašniaj sytuacyi, kali rynak biełaruski lažyć i nieviadoma, kali jon uvohule budzie pačynać padymacca. U takich varunkach vielmi mała achvotnych uziać na siabie adkaznaść».
Karespandent: «Što tyčycca pakietu akcyjaŭ spadara Chadasoŭskaha — ci jon zmoža ŭpłyvać na pryniaćcio kalehijalnych rašeńniaŭ?»
«Lubaja akcyja maje značeńnie. Ale na samoj spravie razmova idzie nie pra padzieł čahości, a pra adkaznaść. Tamu nasamreč — heta nia samaje važnaje na dadzieny momant».
Supracoŭniki hazety «Biełorusy i rynok» nieadnaznačna ŭspryniali kadravyja źmieny.
Viadučaja žurnalistka tydniovika, kiraŭnica addziełu pryvatyzacyi Taciana Manionak raźličvaje, što niaźmiennaj zastaniecca kancepcyja vydańnia, bo heta pryncypovaja pazycyja kalektyvu:
«Vielmi spadziajusia, što tvorčaja kancepcyja, napaŭnieńnie hazety nia źmienicca, jana zastaniecca takoj ža, jak i była. Heta pryncypovaja akaličnaść dla ŭsiaho kalektyvu «Rynku». Tak, patrebnaje raźvićcio hazety, my ŭsie heta razumiejem. Asabliva na pačatku hodu ŭsie adčuli niedachopy reklamy, choć, biezumoŭna, heta tyčycca nia tolki nas, praktyčna ŭsich vydańniaŭ. Kali raniej hazeta vychodziła i na 32 staronkach, i na 24, to ciapier vymušanyja pajści na surjoznyja źmieny ŭ farmacie. Zrazumieła, siońnia treba raźvivać internet-versiju hazety, pryčym vielmi jakasna, vielmi chutka, bo reklamadaŭcy taksama vychodziać u virtualnuju prastoru. Viadoma, my spadziajomsia tolki na dalejšaje raźvićcio hazety. Ale, jašče raz paŭtarusia, i na toje, što kancepcyja zachavajecca pryncypova, heta hałoŭnaja ŭmova ŭsiaho kalektyvu. My raźličvajem i vierym, bo hazeta ŭnikalnaja, heta pieršaja dziełavaja hazeta, jakaja ŭźnikła ŭ Biełarusi».
Viačasłaŭ Chadasoŭski farmalna ŭžo na pensii. Jon naradziŭsia 11 lipienia 1947 hodu, u 1990 hodzie raspracavaŭ kancepcyju hazety «Biełorusskij rynok», ad taho času byŭ jaje hałoŭnym redaktaram. 10 hadoŭ tamu na zahad Alaksandra Łukašenki niedziaržaŭnym ustanovam było zabaroniena vykarystoŭvać u naźvie słovy «biełaruski», «nacyjanalny» i h. d. U vyniku vymušanaha rebrendynhu tydniovik staŭ zvacca «Biełorusy i rynok».