У Брэсце адключаны за няўплату абанент прыйшоў да інтэрнэт-правайдара з нажом ФОТА
Супрацоўнікі абаненцкага аддзела берасцейскага правайдара WikiLink абясшкодзілі яго і здалі ў міліцыю, паведамляе правайдар на старонцы УКантакце.
15.01.2015 / 14:05
Зверху: супрацоўнікі міліцыі і супрацоўнікі кампаніі. Знізу: нож нападніка. Фота са старонкі правайдара УКантакце
Прыкладна ў 13:20 14 студзеня ў абаненцкі аддзел ТАА «ТВСАТ» (партнёр гандлёвай маркі WikiLink) уварваўся раз’юшаны мужчына з нажом. Ён быў незадаволены адключэннем праз запазычанасць і размахваў нажом перад тварам спецыяліста па рабоце з кліентамі.
Зламысніка затрымалі самі супрацоўнікі кампаніі. Затым яго перадалі ў міліцыю. У інтарэсах следства імя нападніка не называецца.
WikiLink прадстаўляе паслугі па падключэнні да інтэрнэту і гарадской камп’ютарнай сеткі ў 5 мікрараёнах Брэста.