«Hieroi-3» vyjduć dla Android i iOS
Papularnaja videahulnia 1999 hoda Heroes of Might and Magic III vyjdzie dla płanšetaŭ na bazie Android i iOS, paviedamlajecca na sajcie Ubisoft.
10.12.2014 / 10:56
Hulnia budzie padtrymlivać kampjutary z apieracyjnaj sistemaj Windows i płanšety na Android dy iOS. Na Windows budzie dastupnaja novaja sistema sietkavaj hulni, ale pra mahčymaść anłajn-bajoŭ na płanšetach nie paviedamlajecca.
Vypusk novaj viersii «HD Edition» zapłanavany na 29 studzienia.
Hrafika hulni budzie palepšanaja dla vysokaha razroźnieńnia. Vyjava adaptavanaja dla šyrokafarmatnych ekranaŭ, chacia zaraz ŭ mnohich scenach pa bakach prysutničajuć «pustyja» bakaviny. Jak kiravańnie hulni budzie adaptavanaje pad sensarnyja ekrany, nie paviedamlajecca.
U novuju viersiju trapiać siem scenaroŭ dla kampanii i 50 kartaŭ dla režymu na šmat karystalnikaŭ, a taksama redaktar kart. Vypuščanaja budzie tolki viersija «Adradžeńnie Erafii», na paźniejšyja dapaŭnieńni Ubisoft nie maje pravoŭ.
Cana Heroes of Might and Magic III HD Edition pakul nieviadomaja.
Heroes of Might and Magic III vyjšła ŭ 1999 hodzie. U pakrokavaj stratehii z bajami ŭmoŭnych armij hulec zmahajecca za panavańnie ŭ fentezijnym śviecie aniołaŭ, demanaŭ, drakonaŭ i miercviakoŭ. Hulnia atrymała vysokija acenki krytykaŭ i hulcoŭ.
Jaje naščadki (čacviortaja, piataja i šostaja častki) byli pryniatyja nie tak ciopła. Fanaty praciahvali raspracoŭvać madyfikacyi i party «Trecich Hierojaŭ». Zaraz braŭziernuju hulniu-naščadka «Hierojaŭ» Might & Magic Heroes Online raspracoŭvaje małaviadomaja kitajskaja kampanija Virtuos.
Na płanšety i smartfony aficyjna pieraniesiena niamała kłasičnych videahulniaŭ z kampjutaraŭ i kansolaŭ: niekalki hulniaŭ sieryi Final Fantasy,Worms, Carmageddon, Baldur's Gate, Bard's Tale, XCOM: Enemy Unknown, Syberia, Max Payne i niekalki častak Grand Theft Auto (GTA III, Vice City, San Andreas) i mnohija inšyja.
Z dapamohaj prahram-emulataraŭ možna zapuścić praktyčna ŭsie hulni dla kansolaŭ da piataha pakaleńnia (da pieršaj Sony Playstation).