Фота: Дзяржаўная служба надзвычайных сітуацый

Фота: Дзяржаўная служба надзвычайных сітуацый

У інтэрв'ю BBC News Украіна міністр аховы здароўя Украіны Віктар Ляшко распавёў:

«Забаронена купанне, лоўля рыбы, нельга піць гэтую ваду, паіць жывёлу. Калі чалавек будзе купацца ў такой вадзе, патэнцыйна могуць узнікнуць захворванні [на халеру, на гепатыты, звязаныя з паразітамі]. Ачышчальныя збудаванні перайшлі на экстранныя рэжымы дэзынфекцыі. Узмоцнены маніторынг якасці вады ў водаправодах, каб не прапусціць успышку», — распавёў Ляшко.

У Чорным моры і на ўкраінскім узбярэжжы адпачываць таксама забаронена, камунальныя службы прыбіраюць трупы жывёл, рыб і малюскаў на дне Кахоўскага вадасховішча, каб прадукты іх гніення не траплялі ў ваду, удакладніў міністр.

Ляшко спадзяецца, што пры захаванні санітарных нормаў успышак эпідэмій можна будзе пазбегнуць.

Раней з'явіліся чуткі аб першым выпадку халеры ва Украіне, але ва ўкраінскім Міністэрстве аховы здароўя гэта адмаўляюць.

«Ніводнага выпадку халеры ў людзей няма. Праводзім эпідманіторынг вадаёмаў, і перыядычна ў нас выяўляюць халерны вібрыён, як звязаны з падтапленнем, так і не звязаны. Так было і раней», — сказаў Ляшко.

Рызыка ўсплёску захворванняў пры гэтым велізарная, адзначыў міністр.

«Таму што выконваць супрацьэпідэмічныя ўмовы, апрацоўваць харчовыя прадукты і іншыя рэчы без пітной вады ў дастатковай колькасці праблематычна. Вада адыдзе, дзесьці будзе багністая мясцовасць, а дзесьці будзе падсыхаць, будзе разносіцца пыл. Гэта ўсё зона рызыкі», — падкрэсліў ён.

Сотні людзей усё яшчэ застаюцца на падтопленых тэрыторыях Херсонскай вобласці.

Па даных на чацвер, на акупаванай частцы Херсонскай вобласці з-за разбурэння Кахоўскай ГЭС загінулі 18 чалавек.

Даныя аб загінулых на падкантрольным Украіне правым беразе ў выніку паводкі апошні раз называліся 12 чэрвеня: тады было вядома аб дзесяці ахвярах.

Клас
2
Панылы сорам
3
Ха-ха
0
Ого
1
Сумна
11
Абуральна
5