Канцэрт да Дня Расіі ў Мінску. Скрыншот відэа
«Так, скажам шчыра, аншлага на ўчарашнім канцэрце, прысвечаным Дню Расіі ў Мінску, не было», — прызнае Мірсалімава ў сваім тэлеграм-канале.
І робіць зусім смелую як для ідэйнага «рускамірца» выснову:
«Улічваючы, што больш за палову з гэтых людзей прыехала цэнтралізавана (па жаданні) з іншых гарадоў, можна смела канстатаваць, што, на жаль, падтрымка Расіі беларускімі грамадзянамі — ніякая. За расійскія сцяжкі не б'юць у беларускай сталіцы — ужо добра, ды і тое — ахоўная зона. А што там спее за ёй і ў галовах маладых беларусаў — Бог ведае. Што заўгодна, але дакладна не любоў да Расіі».
«Сістэмныя нацыяналісты» робяць сваю справу. Не спяшаючыся, сістэматычна, пад маскай «братэрсканароднага сяброўства» паступова адрываюць на ментальным узроўні беларускіх грамадзян ад Расіі. А каб гэтыя працэсы моцна не кідаліся ў вочы, нам з трыумфам будуць паведамляць пра чарговую стопяццот падпісаную інтэграцыйную карту…» — падсумоўвае прарасійская актывістка.
Апошняе выказванне варта разглядаць у кантэксце ўнутраных супярэчнасцяў у лагеры лукашыстаў, дзе ёсць як адкрытыя ненавіснікі абсалютна любых праяў беларускасці накшталт Вольгі Бондаравай, Святланы Жыгімонт ці той жа Мірсалімавай, так і дзеячы накшталт Ігара Марзалюка, Марата Маркава ці Ільі Бегуна, якія, поўнасцю падтрымліваючы Лукашэнку і ягоны рэжым і звязаўшы з ім усю сваю будучыню, усё ж не хочуць цалкам нішчыць нацыянальныя адметнасці накшталт беларускай мовы і культуры, імкнучыся, хутчэй, паставіць іх сабе на службу. Менавіта іх і мае Мірсалімава на ўвазе пад «сістэмнымі нацыяналістамі», з якімі яна вядзе змаганне.
У той жа час прызнанне з боку палымянай адэпткі «рускамірства», што ў надзвычай русіфікаванай у моўным плане і сурова «зачышчанай» трохгадовымі няспыннымі рэпрэсіямі Беларусі яна не адчувае масавай падтрымкі сваіх ідэй, не можа не цешыць.
Чытайце таксама:
Выступ «Любэ» на Дні Расіі ў цэнтры Мінска суправаджаўся кадрамі расійскай агрэсіі супраць Украіны
Хто такія вамбаты? Як лукашыстаў падзяліла на два лагеры адно пытанне
«Настолькі забранзавеў». Бондарава напісала ў пракуратуру на Марзалюка
