Грэта Тунберг. Фота: Michael Probst / AP
Шведская экаактывістка Грэта Тунберг у пятніцу, 9 чэрвеня, правяла сваю апошнюю школьную забастоўку ў абарону навакольнага асяроддзя, піша Deutsche Welle.
«251-ы тыдзень школьных забастовак. Сёння я заканчваю школу, таму больш не змагу страйкаваць за клімат. Гэта мая апошняя школьная забастоўка», — напісала Тунберг у твітары.
Пры гэтым 20-гадовая актывістка запэўніла, што працягне пратэставаць па пятніцах, хоць тэхнічна гэта ўжо будуць не школьныя забастоўкі. «У нас проста няма іншага выбару, акрамя як зрабіць усё, што ў нашых сілах. Барацьба толькі пачалася», — адзначыла яна.
Пратэст Грэты Тунберг
У жніўні 2018 года за тыдзень да парламенцкіх выбараў у Швецыі Грэта Тунберг упершыню выйшла на акцыю ў абарону клімату ў Стакгольме. 15-гадовая школьніца хацела прымусіць палітыкаў прыняць тэрміновыя меры, каб не дапусціць павышэння тэмпературы на зямлі больш, чым на паўтара градуса па Цэльсію. Неўзабаве іншыя школьнікі па ўсім свеце ўзялі прыклад з Грэты і па пятніцах, прапускаючы заняткі ў школе, пачалі выходзіць на акцыі ў абарону клімату.
Тунберг стала візітнай карткай глабальнага руху «Пятніцы дзеля будучыні» (Fridays for Future) і рупарам свайго пакалення, якое занепакоена наступствамі змянення клімату. Яна выступае на розных міжнародных канферэнцыях, сустракаецца з высокапастаўленымі замежнымі дзеячамі і прадстаўнікамі міжнародных арганізацый.
У 2019 годзе амерыканскі часопіс Time назваў Тунберг «Чалавекам года» за ўклад у барацьбу са змяненнем клімату і за тое, што яна стала прыкладам для прадстаўнікоў свайго пакалення ў розных краінах, далучыла іх да грамадскай дзейнасці.
«Шмат што змянілася з тых часоў, як мы пачалі, і ўсё ж нам трэба будзе яшчэ многае зрабіць», — напісала актывістка ў твітары, дадаўшы, што грамадства ўсё яшчэ «рухаецца не ў тым кірунку» ў плане стаўлення да навакольнага асяроддзя.
Чытайце таксама:
Часопіс Time назваў Чалавекам года Грэту Тунберг
Грэта Тунберг: Глабальнае пацяпленне не спыняецца, трэба працягваць барацьбу
Грэта Тунберг зарэгістравала сваё імя ў якасці гандлёвага знаку
