У Бурацію паступіла так шмат «200-х», што адмянілі Масленіцу 3

Першымі аб рашэнні пра адмену свята паведамілі ўлады Кабанскага раёна. 

Афіцыйнае распараджэнне Адміністрацыі Кабанскага раёна Бураціі аб адмене правядзення Масленіцы. Фота: «УКантакце»

Затым падобныя рашэнні прынялі ў Заіграеўскім, Тарбагатайскім, Івалгінскім раёнах.

Паведамленні аб адмене святкавання Масленіцы. Скрыншоты старонкі «Мемориал памяти военным из Бурятии» «УКантакце»

У адпаведнасці з інфармацыяй з сацыяльных сетак, колькасць нядаўна загінулых можа складаць 70 чалавек. 

Аб тым, што лічбы загінулых могуць быць значнымі, ускосна сведчыць факт прысваення 24 лютага 2023 года асобным указам прэзідэнта Расіі 35-й зенітнай ракетнай брыгадзе, якая ўваходзіць у склад 36-й агульнавайсковай арміі і дыслакуецца ў Бураціі, наймення «гвардзейская» «за масавы гераізм і адвагу, стойкасць і мужнасць, праяўленыя асабовым складам брыгады ў баявых дзеяннях па абароне Айчыны і дзяржаўных інтарэсаў ва ўмовах узброеных канфліктаў».

Абмеркаванне навіны аб адмене Масленіцы «УКантакце» дае ўяўленне аб настроях насельніцтва. Побач з такімі выказванням, як «Вечная слава героям!», ёсць і меркаванні кшталту «Якім героям? Прыйшлі ў чужую краіну забіваць людзей», «Увогуле тады па ўсёй Расіі неабходна жалобу абвясціць да самага заканчэння СВА, калі так пайшло».

Каментары да навіны аб адмене Масленіцы. Скрыншот старонкі «УКантакце» «Аноним Кабанского района»

У каментарах пад навіною аб адмене святкаванняў у тэлеграм-канале «Режим Б» пытаюцца аб тым, хто панясе адказнасць за такія страты, а таксама заўважаюць: «Главу [раёна] самога чапляе такая сітуацыя, калі яго землякоў раптам вязуць загінулымі дзясяткамі».

Каментар у тэлеграм-канале «Режим Б». Скрыншот тэлеграм-канала

Паводле апошніх ацэнак амерыканскай і брытанскай разведак, расійскія страты, з улікам ПВК «Вагнер», а таксама фарміраванняў марыянеткавых «ДНР» і «ЛНР», на гэты момант дасягнулі 175—200 тысяч чалавек, з іх 40—60 тысяч загінулі.

Nashaniva.com