Фота: vecteezy
Федэральны ўрад ЗША можа разгледзець пытанне аб забароне газавых пліт з-за росту заклапочанасці з нагоды ўздзеяння прыбораў на здароўе, паведамляе Bloomberg. Прадстаўнік Камісіі ЗША па бяспецы спажывецкіх тавараў, Рычард Трамка-малодшы, назваў газавыя пліты «схаванай небяспекай» і сказаў, што агенцтва разгледзіць шэраг варыянтаў, у тым ліку абмежаванне вытворчасці або імпарту газавых пліт і/або ўвядзенне стандартаў, калі ад іх трэба пазбаўляцца. Сёння каля 35% хатніх гаспадарак у ЗША маюць газавыя пліты.
Навукоўцы апошнія 40 гадоў папярэджвалі, што гэтыя печы могуць выкідваць шкодныя для здароўя ўзроўні забруджвальных рэчываў, такіх як дыяксід азоту, угарны газ, метан і бензол. Розныя даследаванні, што паказваюць небяспеку газавых пліт для здароўя — ад сардэчна-сасудзістых праблем да раку, — пачынаюць уплываць на грамадскае меркаванне і выклікаюць занепакоенасць людзей з нагоды патэнцыйнай небяспекі.
Так, зусім нядаўна мы пісалі пра даследванне ў Каліфорніі, якое выявіла, што ўзровень бензолу, які могуць вылучаць газавыя пліты, параўнальны з колькасцю бензолу ад пасіўнага курэння. А ў мінулым месяцы чарговае даследаванне паказала, што газавыя пліты могуць быць адказныя за кожны восьмы выпадак дзіцячай астмы ў ЗША.
Газавыя пліты таксама пагаршаюць стан экалогіі: штогод яны выкідваюць так шмат метану, што гэтыя выкіды парніковых газаў эквівалентныя 500 000 аўтамабіляў з газавым рухавіком. Больш за тры чвэрці гэтых выкідаў адбыліся, калі пліта нават не выкарыстоўвалася.
Барацьба з газавымі плітамі ў ЗША набывае ўсё больш маштабны характар. Рух за поўную забарону падключэння прыроднага газу да будынкаў прывёў да таго, што ў 2019 годзе каліфарнійскі горад Берклі стаў першым горадам у свеце, які забараніў газавыя падключэнні ў новых будынках. Зараз дзясяткі амерыканскіх гарадоў рушаць услед, у тым ліку Нью-Ёрк, дзе гістарычны законапраект аб забароне новых газавых падключэнняў уступіць у сілу для малых будынкаў ужо сёлета. А ў верасні мінулага года Каліфорнія стала першым штатам, які заканадаўча зацвердзіў паступовую адмову ад выкарыстання прыроднага газу, у прыватнасці для воданагравальнікаў, да 2030 года.
Нядзіўна, што вытворцы прыроднага газу змагаюцца з гэтым зубамі і пазногцямі. Галіна каардынуе намаганні па падтрымцы заканадаўцаў, што прасоўваюць законы, якія не дазваляюць гарадам і мястэчкам забараняць прыродны газ: 20 штатаў (якія складаюць каля траціны агульнага выкарыстання прыроднага газу ў ЗША) прынялі такія «абарончыя» законы з 2020 года.
Gizmodo распавядае, што газавая прамысловасць у сваім змаганні за жыццё зайшла так далёка, што нават набірае ўплывовых людзей у інстаграме, каб яны паэтычна выказваліся пра свае газавыя пліты. А амерыканскія эколагі абвінавачваюць газавых вытворцаў у тым, што менавіта апошнія стаяць за незадаволенасцю і судовымі пазовамі некаторых прадстаўнікоў рэстараннай індустрыі ў дачыненні да мясцовых забаронаў на газ.
«Існуе памылковае меркаванне, што, калі вы хочаце прыгатаваць ежу з вытанчанай кухні, гэта трэба рабіць на газе, — сказаў вышэйзгаданы Трамка. — Гэта старанна дагледжаны міф».
