Фота: vecteezy

The Washington Post паведамляе пра даследаванне, праведзенае ў Германіі. Згодна з ім, малочныя каровы, якіх кармілі прамысловымі каноплямі, выраблялі малако з дэльта-9-тэтрагідраканабінолам. Гэта можа паўплываць на патэнцыйнае выкарыстанне канапель у якасці інгрэдыента камбікармоў.

Рэцэнзаванае даследаванне, праведзенае на галштынскіх каровах у Берліне і апублікаванае ў часопісе Nature Food, з'яўляецца адным з першых вялікіх даследаванняў выкарыстання прамысловых канопляў у якасці патэнцыйнага дадатку ў корм для жывёл.

Новае даследаванне адбываецца ў той час, калі сельская гаспадарка вяртаецца да канапель, якія масава вырошчвалі да першай паловы ХХ стагоддзя, калі ад іх адмовіліся ў рамках змагання з наркотыкамі.

Каноплі — агульная назва расліны Cannabis sativa. Людзі вырошчвалі яе тысячы гадоў з рознымі мэтамі: з іх плялі вяроўкі і сеткі, а з насення выціскалі алей. Кветкі канабіса маюць высокую канцэнтрацыю дэльта-9-тэтрагідраканабінолу — ТГК. Гэта малекулярнае злучэнне, якое выклкіае пачуццё «эйфарыі».

Каноплі з высокім узроўнем ТГК называюць «марыхуанай». Прамысловыя ж каноплі — гэта не «траўка». У заходніх краінах прамысловыя каноплі пачынаюць зноў вяртацца ў сельскую гаспадарку. Напрыклад, у ЗША яны больш не ўваходзяць у спіс кантраляваных рэчываў, калі не ўтрымліваюць больш за 0,3 працэнта ТГК.

Адным з пабочных прадуктаў зменаў у заканадаўствах з'яўляецца рынак іншага малекулярнага злучэння, атрыманага з канопляў, — канабідыёлу, або CBD. Рынак гэты на сённяшні дзень вельмі бурна развіваецца: тавары з CBD звычайна прадаюцца з-за меркаванай карысці для здароўя ў выглядзе кропель і як дадаткі ў шматлікіх касметычных сродках.

Гэта ўсё яшчэ адносна невялікі кавалак рынку сельскагаспадарчых тавараў, але ўсё можа змяніцца. Даследчыкі кажуць, што каноплі могуць быць выдатнай крыніцай корму для жывёл, калі дзяржаўныя рэгулятары ўхваляць гэта. Насенне канопляў не ўтрымлівае ТГК, і ў іх шмат бялку. 

Даследчыкі з Нямецкага федэральнага інстытута ацэнкі рызыкі не выявілі ніякіх змен у паводзінах кароў, якія ўжывалі каноплі з нізкім ўзроўнем ТГК. Згодна з даследаваннем, толькі пры кармленні часткамі з больш высокай канцэнтрацыяй ТГК з'яўляліся эфекты ў паводзінах і стане, якія ўключалі запавольванне сардэчнага рытму і дыхання, узмоцненае пазяханне, слінавыдзяленне, фарміраванне насавога сакрэту і пачырваненне часткі вачэй.

Некаторыя жывёлы мелі асцярожную, часам хісткую хаду, прымалі нязвыклыя позы і маглі працяглы час стаяць на адным месцы. Пры ўжыванні корму з высокім утрыманнем ТГК жывёлы таксама елі менш і выраблялі менш малака.

Іншае магчымае выкарыстанне канапель у жывёлагадоўлі — гэта сродак для зніжэння стрэсу, напрыклад, падчас транспартавання кароў. Навукоўцы праводзілі даследаванні на бычках, якіх кармілі каноплямі, і жывёліны, як правіла, станавіліся больш спакайнымі, бо канабіноіды зніжаюць узровень гармонаў стрэсу.

«Вы яшчэ доўга не ўбачыце на паліцах малако, узбагачанае CBD», — сказаў Джэфры Штайнер, дырэктар Глабальнага інавацыйнага цэнтра канапель пры Універсітэце штата Арэгон.

Штайнер, які не ўдзельнічаў у нядаўна апублікаваным даследаванні, эксперыментаваў з каноплямі ў якасці кармавой дабаўкі для дойных кароў, авечак і хатняй птушкі. Але яго каманда атрымала дазвол на вывучэнне канапель толькі з 2019 года.

«Увесь гэты час каноплі затрымаліся ў капсуле часу, і нічога немагчыма было з гэтым зрабіць, — сказаў Штайнер. — Цяпер трэба нагнаць страчанае, дазволіць каноплям выйсці на рынак і дазволіць навуцы стаць асновай для прыняцця рашэнняў».

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

0
a.hto.tam.idze / Адказаць
01.12.2022
Навіна з шэрагу "no shit Sherlock" :-)
0
Юзік са станцыі Крулеўшчына / Адказаць
02.12.2022
Памятаю, малы быў, а наша хата самай першай у Глыбокім... Выйду з хаты, а там канапель аж да небасхілу, аж да самых Докшыцаў! Падыйшлі мы неяк з бацькам да гэтага гаю... Глянуў уверх, дык маіх тадышных ростаў штук 5 трэба скласці! Во часы былі!
3
хамса / Адказаць
02.12.2022
Юзік са станцыі Крулеўшчына, дык у кніжцы савецкіх часоў выдання Блюда белорусской кухни - ледзь не праз рэцэпт стравы з каноплямі 
Паказаць усе каментары/ 8 /
Каб пакінуць каментар, калі ласка, актывуйце JavaScript у наладах свайго браўзеру