«Квантум 2.0» знаходзіцца на ніжнім ярусе ЗАГСа на праспекце Газеты Праўда, 29. У музеі некалькі тэматычных зон, дзе стаяць каля 200 экспанатаў. Да «Квантум 2.0» далучылася і калекцыя музея чалавека, што зачыніўся ў цэнтры Мінска. Такім чынам, тут размясціліся некалькі тэматычных зон: оптыка, акустыка, магнітызм, біялогія, энергія і інш. Галоўнае — з усімі прадметамі можна ўзаемадзейнічаць.
Прадстаўнікі музея адзначаюць, што фокус зроблены на гульнявой форме і інтэрактыўнасці.
— Усе экспанаты дэманструюць навуковыя факты, але робяць гэта даходліва і займальна, каб дзецям было цікава. Пры гэтым у нас няма абмежаванняў: да экспанатаў можна дакранацца, круціць — мы ж разумеем, што шлях да ведаў не можа быць простым.
Наведвальнікі музея змогуць знайсці ўладкаваны пакой Тэслы з маланкамі, а таксама цёмны пакой са шпіёнскім люстэркам. Даступная дзецям і мэбля Гулівера. Акрамя гэтага, гасцей чакаюць выпрабаванні: трэба будзе выбрацца з люстранога лабірынта, пабудаваць мост з гаек без фізічнай сілы, выканаць ролю рок-музыканта ці паўдзельнічаць у раскопках дыназаўраў. Аматараў біялогіі таксама чакаюць задачы, якія дапамогуць зразумець, як збудаваны арганізм, працуе мозг і б'ецца сэрца.
У музеі паказваюць навуковыя шоу і майстар-класы. Для вялікіх груп праводзяць тэматычныя экскурсіі.
Дзіцячы білет каштуе 12 рублёў у будны дзень і 14 — у выхадны. Цана для дарослага — ад 13 да 16 рублёў. Дзяцей да 3 гадоў, як і ветэранаў, пускаюць бясплатна. У «Квантуме» можна знаходзіцца з моманту адкрыцця да закрыцця — з 10 да 21 гадзіны штодня.
