Мядзведзеў напісаў, што Расіі не патрэбныя чужыя тэрыторыі, бо вайскоўцы абараняюць сваю святую зямлю і сваіх людзей, ваююць за сваю тысячагадовую гісторыю.
«Мы змагаемся супраць тых, хто ненавідзіць нас, хто забараняе нашу мову, нашы каштоўнасці і нават нашу веру, хто ўкараняе нянавісць да гісторыі нашай Айчыны», — напісаў ён.
На думку Мядзведзева, супраць Расіі ваюе «частка паміраючага свету» — «купка звар'яцелых нацыстаў-наркаманаў, адурманены і запалоханы імі народ і вялікая зграя брахлівых сабак з заходняй псарні».
«У гэтых людзей няма веры і ідэалаў, акрамя «пахабных звычак» і двудумства. Таму, падняўшыся супраць іх, мы набылі сакральную моц», — мяркуе Мядзведзеў.
«Ад нас адмовіліся некаторыя спалоханыя партнёры — і пляваць на іх. Значыць, яны былі нам не сябры, а проста выпадковыя пасажыры, прыліпалы і прыхлябацелі. Звалілі за трыдзевяць зямель баязлівыя здраднікі і сквапныя перабежчыкі — хай згніюць іх косткі на чужыне. Іх няма сярод нас, а мы сталі мацнейшымі і чысцейшымі», — лічыць былы прэзідэнт.
«У нас ёсць магчымасць адправіць усіх ворагаў у геену агнявую, але не гэта наша задача. Мы слухаем словы стваральніка ў нашых сэрцах і падпарадкоўваемся ім. Гэтыя словы і даюць нам святую мэту. Мэта — спыніць вярхоўнага ўладара пекла, якое б імя ён ні выкарыстаў — Сатана, Люцыпар або Ібліс. Бо яго мэта — пагібель», — напісаў Дзмітрый Мядзведзеў.
