Са слоў экспертаў і прадстаўнікоў Міністэрства абароны ЗША, пачынаючы з затаплення расійскага флагмана «Масква» ў Чорным моры ў красавіку і заканчваючы атакай на расійскую авіябазу ў Крыме ў гэтым месяцы, украінскія войскі выкарыстоўвалі амерыканскую і іншую зброю так, як мала хто чакаў.
Напрыклад, украінскія сілы хутчэй перамяшчаюць ракеты, грузячы іх на грузавікі. А баявыя магчымасці УСУ на моры былі павялічаныя шляхам устаноўкі ракетных сістэм на хуткаходных катэрах.
Высокапастаўлены прадстаўнік Пентагона заявіў, што ўкраінскія сілы ўсталявалі пастаўленыя амерыканцамі ракеты HARM на савецкія знішчальнікі МіГ-29. Гэтага ніколі не рабілі да таго — лічыцца, што гэтыя ракеты несумяшчальныя з МіГ-29 і іншымі знішчальнікамі, наяўнымі на ўзбраенні Украіны.
«Вы не можаце проста павесіць любую ракету на любы самалёт, тут задзейнічана шмат авіёнікі і іншых аспектаў высокапрадукцыйных самалётаў. А яны гэта зрабілі», — падкрэсліў былы галоўнакамандуючы арміяй ЗША ў Еўропе Фрэдэрык Б. Ходжэс.
Да здзіўлення экспертаў па ўзбраеннях, Украіна працягвае знішчаць расійскія цэлі з дапамогай ціхаходных ударных беспілотнікаў турэцкай вытворчасці «Байрактар» і недарагіх пластыкавых лятаючых апаратаў, мадыфікаваных для скіду гранат і іншых боепрыпасаў.
Амерыканскія вайсковыя чыноўнікі збянтэжаныя тым, чаму расійскія шматузроўневыя сістэмы СПА не аказаліся больш эфектыўнымі ў барацьбе з беспілотнікамі, у якіх няма сістэм самаабароны і якія лёгка выяўляюцца радарам ды лётаюць з хуткасцю ўсяго каля 128 км/гадзіну.
Генерал Ходжэс адзначыў, што праз здольнасць украінскіх вайскоўцаў знішчаць расіян незвычайным спосабам іх параўноўваюць з Макгайверам — героем тэлесерыяла 1980-х гадоў, які выкарыстаў простыя імправізаваныя прыстасаванні, каб выбрацца з далікатных сітуацый.
Эксперты таксама адзначаюць, што інжынерная вынаходлівасць украінцаў рэзка кантрастуе з павольным, марудлівым, дактрынальным характарам наступлення расіян.
Шматлікія атакі на расійскія вайсковыя аб'екты ў Крыме таксама дэманструюць здольнасці ўкраінцаў, адзначаюць журналісты. Да прыкладу, удар па аэрадроме ў Саках 9 жніўня. Амерыканскія афіцыйныя асобы кажуць, што Украіна нанесла гэты ўдар без папярэдняга ўзгаднення з амерыканскімі і іншымі заходнімі хаўруснікамі.
Акрамя таго, украінскія спецназаўцы і партызаны выкарыстоўвалі імправізаваныя зброю, выбухоўку і тактыку ў ходзе ўдараў.
«Дзеянні на Крымскім паўвостраве, верагодна, азначаюць сабой новую фазу ў вайне, калі ўкраінцы пераходзяць у наступленне з нерэгулярнай ваеннай кампаніяй, накіраванай на выцясненне Расіі з зоны, у бяспецы якой яна ўпэўненая», — сказаў Мік Малрой, былы супрацоўнік Пентагона і афіцэр ЦРУ.
