Пракоп'еў працягнуў:
«У беларусаў быў шанец у 2020 годзе. Назапашаная прага жыцця, прага пераменаў, наша падушанае еўрапейства выплюхнула вонкі, і праціўнік быў разгублены. Тыдні два ў нас было, каб знесці калгасную хунту і сесці за стол перамоваў з разгубленай Масквой. Мы ўпусцілі гэты шанец: таму што любаваліся народным пад'ёмам, так і не дадумаўшыся зрабіць рэзервовы камандны пункт.
Час сышоў, добрых сцэнарыяў не засталося. Цяпер толькі вайна, толькі хардкор».
Пракоп’еў спадзяецца на вызваленне Беларусі ўкраінскай арміяй.
«Загартаваная ў баях армія Украіны нават не заўважыць арміі Лукашэнкі. Мінск будзе ўзяты за тры дні — як Пуцін марыў пра Кіеў», — так малюе карціну магчымай будучыні Вадзім Пракоп'еў.
Але, на ягоную думку, так здарыцца толькі тады, калі Украіна будзе бачыць у беларускай апазіцыі сілу і лютае жаданне перамагчы. Пакуль, на думку Пракоп'ева, Кіеў такога не бачыць.
Вадзім Пракоп'еў настойвае, што трэба стварыць альтэрнатыўныя органы ўлады, і гэта мусіць быць урад, а не набор ініцыятыў і суполак.
«У складзе гэтага ўрада павінна быць грамадзянская і ваенная частка, і ўсе неабходныя атрыбуты падобнай арганізацыі, уключаючы МЗС, дэпартамент фінансаў, падліковую палату, службу ўласнай бяспекі».
У падначаленні ў гэтага ўрада мусяць быць узброеныя сілы і «свой маленькі «Масад», лічыць Пракоп'еў.
«Кіраўніку такога ўрада трэба будзе прымаць непапулярныя рашэнні, магчыма, падымаць народ на паўстанні». І задае пытанне Ціханоўскай: вы гатовыя быць такім кіраўніком?
Ëн прапануе Ціханоўскай ужо заўтра «прыняць прысягу, паклаўшы руку на Канстытуцыю».
«Калі ваш адказ «не», мы вас зразумеем і не асудзім, але папросім вас перадаць частку паўнамоцтваў прэм'ер-міністру. Усё астатняе — дурасць і панты», — кажа Пракоп'еў.
