У Мінску шалёныя чэргі па апастыль, запісваюцца ўжо на сакавік наступнага года 3

Чарга па апастыль у Мінску ў красавіку. Фота: dev.by

Першыя праблемы з апастылем у Беларусі з'явіліся 10 сакавіка гэтага года, калі ведамства больш за дзесяць дзён не прымала дакументы. З другой хваляй цяжкасцяў беларусы сутыкнуліся 22 сакавіка, калі кошт легалізацыі дакументаў вырас у 10 разоў (з 16 да 160 рублёў). А зараз чэргі б'юць чарговыя рэкорды.

Мінчанка Ганна падавала дакументы на апастыль сёння. Дзяўчыне пашанцавала: запісаўшыся ў сярэдзіне красавіка, яна чакала ўсяго тры месяцы. Яе сяброўцы пашанцавала менш.

— Яе запісалі на 3 сакавіка 2023 года.

Пакуль мы стаялі ў чарзе, нават быў жарт, што калі хочаш апастыляваць пасведчанне аб нараджэнні дзіцяці, трэба запісвацца, як толькі зацяжарыш. І якраз калі дзіця народзіцца, падыдзе чарга, — смяецца суразмоўца.

— Нормы на прыём у МЗС цяпер такія: альбо 50 чалавек, альбо 120 дакументаў у дзень. Пры гэтым і на запіс кожны дзень прыязджае прыкладна столькі ж. Павелічэнне цэны на апастыль не асабліва нешта змяніла.

Па словах дзяўчыны, каля дзвярэй МЗС зараз фармуюцца некалькі чэргаў. Першая — ужо запісаныя на падачу людзі. Другая — іншаземцы, трэцяя — людзі, якія толькі хочуць запісацца. Асобна стаяць тыя, хто хоча атрымаць апастыль не запісваючыся, па жывой чарзе. Ганна кажа, што гэтыя людзі чакаюць вольнае акенца:

— Казалі, што людзі там стаяць па два тыдні, па начах праходзяць пераклічкі. І тады яны на працягу двух тыдняў атрымліваюць свае дакументы, могуць неяк уціснуцца. Напрыклад, калі нехта, хто па запісе, не прыйшоў. Або просяць людзей, якія ўжо заходзяць, узяць і іх дакументы — раптам прымуць. Усяго такіх было чалавек 30-40. Дзесьці 10-15 з іх стаяла ля ўваходу, хтосьці на лавачцы сядзеў, хтосьці ў машыне.

Алена, расказала пра сітуацыю з дакументамі мужа. Яму неабходна засведчыць даведку аб адсутнасці судзімасці для працы ў Літве.

— Выявілася, што запіс у МЗС ужо на сакавік 2023 года.

Сталі шукаць іншыя варыянты і даведаліся, што некалькі агенцтваў прапанавалі запісацца на кастрычнік-лістапад за 350 рублёў. Яшчэ адно агенцтва, магчыма, знойдзе месца на канец ліпеня за 500 рублёў.

І гэта пры кошце самога апастыля ў 160 рублёў! — абураецца суразмоўца. — Але я не разумею, як гэта магчыма. У МЗС мне сказалі, што так і ёсць, агенцтвы неяк займаюць месцы. Больш ніякай інфармацыі не далі.

«Зеркало» патэлефанавала ў адно з агенцтваў, у якія звярталася чытачка. Расцэнкі і праўда здзіўляюць: 2000 рублёў — апастыль на арыгінал дакумента ў МЗС, 250 рублёў — на копію дакумента ў Мінюсце. І тое ў выпадку, калі знойдзецца вольнае месца.

— Цяпер месцаў няма, патэлефануеце ў панядзелак, — параілі нам. А на пытанне, чаму так дорага, адказалі лаканічна:

— Таму што ў МЗС найбліжэйшы запіс на сакавік.

МЗС: «Перастануць ехаць — чаргі не будзе»

З пытаннямі, чаму такая доўгая чарга і чаму б не пашырыць штат, журналістка «Зеркала» патэлефанавала ў МЗС як прыватная асоба. У галоўным консульскім упраўленні пацвердзілі: чарга і праўда расцягнулася ўжо да сакавіка наступнага года.

— А чаму такі вялікі тэрмін трэба чакаць?

— Таму што людзі выязджаюць і запісваюцца ў чаргу.

— Як мне сказалі, вы прымаеце цяпер па 50 чалавек у дзень. А можа быць, можна прымаць больш, калі такія чэргі?

— У нас прымаюць столькі, колькі могуць. Ніякіх не 50, а больш.

— То-бок раней сакавіка запісацца не выйдзе?

— Не. Пакуль усе едуць — запіс на сакавік. Перастануць ехаць — чаргі не будзе.

Nashaniva.com

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ