Гітанас Наўседа. Фота: Judita Grigelytė / Verslo Žinios
Наўседа сказаў, што «вельмі сур'ёзныя фундаментальныя змены» ў суседняй Беларусі робяць Літву больш уразлівай для хуткага нападу Расіі і патрабуюць змены механізмаў бяспекі ў рэгіёне.
Літоўскі лідар сказаў, што сённяшнюю Беларусь ён успрымае як «дадатковую правінцыю» Масквы, дадаўшы, што»расійскае войска можа рабіць усё, што хоча, перакідаць сілы, размяшчаць тэхніку».
Наўседа нагадаў, што ў мінулым стратэгія НАТА грунтавалася на падмацаваннях. Невялікія сілы былі размешчаны на ўсходняй ўскраіне альянсу і чакалася, што саюзнікі прыйдуць на дапамогу рэгіёну ў выпадку нападу. Але новая рэальнасць, па словах літоўскага лідара, «не пакідае нам часу на рэакцыю», таму што расійскія войскі «могуць быць лёгка перакінутыя ў непасрэдную блізкасць ад нашай мяжы і часу для падмацавання не будзе».
Германія, якая ўзначальвае баявую групу НАТА ў Літве, нядаўна абвясціла, што павялічыць свой уклад у абарону краіны. План уключае войскі, якія будуць накіраваныя на гарантаванне бяспекі Літвы, але фармальна будуць базавацца ў Германіі.
Хоць лідары краін Балтыі настойваюць на павелічэнні колькасці войскаў і пастаяннай прысутнасці, прэзідэнт Літвы прызнаў наяўнасць шматлікіх матэрыяльна-тэхнічных перашкод.
«Пастаяннае размяшчэнне сіл НАТА ў Літве было б нашым прыярытэтам, але гэта таксама залежыць ад нашых магчымасцяў і здольнасці іх прыняць», — сказаў ён, спаслаўшыся на патрэбу ў адпаведнай інфраструктуры.
