Daktary abviarhajuć infarmacyju, što Šubič pastupiła ŭ balnicu pozna

Pavodle zapisaŭ u pryjomnym pakoi, jana była ŭ balnicy ŭžo a 18.30, vyśvietliła Jeŭraradyjo.

13.04.2011 / 20:34

Pavodle zapisaŭ u pryjomnym pakoi, jana była ŭ balnicy ŭžo a 18.30, vyśvietliła Jeŭraradyjo. Darečy, Šubič fihuruje ŭ śpisach paranienych, dastaŭlenych u 3-ju balnicu, raźmieščanym na sajcie «Našaj Nivy» a 21.26.

Na nastupny dzień paśla vybuchu ŭ minskim mietro u internecie źjaviłasia infarmacyja pra dziaŭčynu, jakaja nibyta lažała pad zavałami da 23-j hadziny.

Maryna Šubič, studentka 5 kursa BDEU, ciapier znachodzicca ŭ 3-j haradskoj kliničnaj lakarni.

Karespandent Jeŭraradyjo nakiravaŭsia da zahadčycy pryjomnaha addzialeńnia balnicy, kab daviedacca, a jakoj hadzinie dziaŭčynu pryvieźli na chutkaj.
«Doktar piša 18:25 — 18:30.

Usie jany pačali pryjazdžać pieršyja ŭ 18:10, potym u 18:20, u 18:45. Napeŭna, apošni dzieści ŭ 19:20», — pakazvaje žurnał z zapisami zahadčyca addzialeńnia.

«Usie pryjšli na dapamohu, z domu lacieli ŭsie miedyki siudy, jak tolki pačuli. U mianie adzin pavinien dziažuryć ŭrač terapieŭt, a było razam sa mnoj, atrymlivajecca, čatyry. Dva lekary prylacieli z chaty. Chirurhaŭ było 17, napeŭna, zamiest troch dziažurnych».

Hałoŭny doktar kliniki Uładzimir Komar kaža, što infarmacyja pra dziaŭčynu — chłuśnia.
«Heta niapraŭda.

Heta ŭsie pacviardžajuć fakty. Pačynajučy ad supravadžalnaha lista chutkaj dapamohi, ad fiksavanaha vykliku samoj chutkaj dapamohi da pastupleńnia da nas ŭ pryjomny pakoj i da momantu pačatku apieracyi, usio dakumientalna pacvierdžana. Toje, što raspaŭsiudžanaja niejkaja chłuślivaja infarmacyja, — jana nie adpaviadaje rečaisnaści».

Dziaŭčyna prybyła ŭ lakarniu ŭ vielmi ciažkim stanie z čerapna-mazhavoj traŭmaj, pierałomam nahi i šmatlikimi ranieńniami. Ale ciapier, zhodna sa słovami miedyka, pahrozy dla jaje žyćcia niama.

Słovy daktaroŭ pacviardžaje toj fakt, što Šubič fihuruje ŭ śpisach paranienych, dastaŭlenych u 3-ju balnicu, raźmieščanym na sajcie «Našaj Nivy» a 21.26. Naš reparcior śpisvaŭ jaho asabista kala balnicy.

Śviedčańni jaje siabroŭki, jakaja kazała, što «bačyła, jak Šubič vynosili, a 23-j hadzinie», i supracoŭnicy balnicy, jakaja kazała, što Šubič dastavili pozna, možna adnieści na rachunak šokavaha stanu ludziej paśla vybuchu.

Heta nie adziny vypadak pamyłak u stresavaj situacyi paśla vybuchu. Tak, navat kampietentnyja orhany spačatku pamyłkova ŭklučyli dźvie asoby ŭ śpis pamierłych i apublikavali ich imiony.

Zastajecca pažadać spadaryni Šubič najchutčejšaha vyzdaraŭleńnia, a daktaram i ratavalnikam vykazać padziaku za samaaddanuju pracu.

Red.